លោក​មេ​វរៈ វ័យក្មេង​៨១៩ កំពុង​បើក​ភ្លើង​ខៀវ​អោយ​ឈ្មួញ​នាំចូល រថយន្ត​ចង្កូត​ស្តាំ​យ៉ាងគំហុក តាម​ច្រក​ព្រះពុទ្ធ​

ខេត្ត​បាត់ដំបង ៖ ថ្មីៗ​នេះ សារ​សម្លេង​មួយ​បាន​បែកធ្លាយ​ស្តី​ពី​ការចរចារ​គ្នា រវាង​មេ​ឈ្មួញ ជាមួយនឹង​លោក ម៉ង់ ស៊ី មេបញ្ជាការ នគរបាល​វរៈ​ការពារ​ព្រំដែន​គោក លេខ ៨១៩ ប្រចាំ​ស្រុក​កំរៀង និង​ប្រចាំ​ច្រករបៀង​ព្រះពុទ្ធ ហៅ​ច្រក​បឹង​ឆ្នាំង ស្ថិត​ក្នុង​ទឹកដី​ស្រុក​កំរៀង ខេត្ត​បាត់ដំបង ដែល​ជាប់​នឹង​ខ្សែ​បន្ទាប់​ព្រំដែន​កម្ពុជ ថៃ ដែល​សារ​នេះ​គឺជា​ការសុំ​សម្របសម្រួល​តម្លៃ ដើម្បី​នាំ​រថយន្ត ចំនួន ២ គ្រឿង ចូល​តាម​ច្រក​ដែល​គ្រប់គ្រង​ដិយ​មេបញ្ជាការ ៨១៩ ។​

​យោងតាម​ប្រភព​សម្ងាត់ និង​ច្បាស់ការ​មួយ បាន​អោយ​កម្ពុជា​ថ្មី ដឹងថា មួយរយៈ​កន្លងមកនេះ គឺ​ចាប់តាំងពី​លោក ម៉ង់ ស៊ី ទៅកាន់​ជា​មេបញ្ជាការ នគ​បាល វរៈ​ការពារ​ព្រំដែន​គោក​លេខ ៨១៩ មក គឺ​មាន​ការបើក​ភ្លើង​ខៀវ​យ៉ាង​ពេញបន្ទុក ដើម្បី​អោយ​ក្រុម​ឈ្មួញ បាន​នាំ​ចូល​នូវ​រថយន្ត​ប្រភេទ​ចង្កូត​ស្តាំ ដែល​ជា​ប្រភេទ​រថយន្ត​ត្រូវ​ហាមឃាត់ អោយ​ចូល​យ៉ាងគំហុក​ពី​ថៃ មក​កម្ពុជា ដើម្បី​ទទួល​នូវ​ផលប្រយោជន៍​ផ្ទាល់ខ្លួន​។​

​ប្រភព​ដដែល​បាន​លើកឡើង​ថា រថយន្ត​ដែល​គេ​បាន​បើកដៃ​អោយ​ឈ្មួញ​នាំ​ចូល​នោះ សុទ្ធសឹងតែ​ជា​ប្រភេទ​រថយន្ត​ទំនើបៗ និង​មាន​បំពាក់​ស្លាក​លេខ​ថៃ​នៅ​ឡើយ លុះ​មកដល់​ដី​ខ្មែរ ទើប​លោក​មេបញ្ជាការ​រូប​នេះ​ចាប់​ចែង បញ្ជា​ទៅ​លោក នាយរង​ប៉ុស្តិ៍ ខូវ សុភាព ជា​អ្នក​ដោះដូរ​ស្លាក​លេខ វិញ ទើប​ប្រគល់​ទៅ​អោយ​ឈ្មួញ​បញ្ចេញ​ទៅ​លក់​នៅលើ​ទីផ្សារ ដោយ​ភាគច្រើន​គឺ​គេ​បញ្ចេញ​ទៅកាន់​ក្រុង​ប៉ោយប៉ែត ។​

​ចំណែក​តម្លៃ​លើ​ការនាំ​ចូល​រថយន្ត​ចង្កូត​ស្តាំ សម្រាប់​តែ​លោក​មេបញ្ជាការ ម៉ង់ ស៊ី គឺ​ចាប់ពី ១០ ០០០ បាត ដល់ ៣០ ០០០ បាត ទៅ​តាម​ប្រភេទ និង ស៊ែ​រី រថយន្ត រហូត​មាន​ពេលខ្លះ បាន​កើត​ទៅ​ជា​ទំនាស់​ក៏មាន​ដែរ ដោយសារ​តែ​ការទាមទា​នូវ​តម្លៃ​មិនបាន​ដូច​បំណង ។​

​ការគ្រប់គ្រង​ច្រករបៀង​នៅក្នុង​តំបន់​ខាងលើ ពី​សំណាក់​លោក ម៉ង់ ស៊ី គឺ​គេ​បាន​វាទទី និង​លាតសន្ធឹង​យ៉ាង​ឆ្ងាយ ដើម្បី​ក្តោប​ក្តាប់​នូវ​បទល្មើស​គ្រប់​ប្រភេទ​ទាំង​ការនាំ​ម៉ូតូ​ចូល ក៏ដូចជា​ការនាំ​ឈើ​គ្រញូង របស់លោក «​ភី​យ៉ៃ​ណុង​» ដែល​ឈ្មោះ​នេះ គឺ​ជា​មេ​ឈ្មួញ​រកស៊ី​ឈើ​គ្រញូង​ពី​ថៃ មក​ខ្មែរ នៅ​ចន្លោះ ប៉ុស្តិ៍​ស្វាយ ស និង​ប៉ុស្តិ៍ អូរ​ជ្រៃ គឺ​ត្រូវ​បង់​អោយ​លោក ម៉ង់ ស៊ី ទាំងអស់ ។​

​ជា​ចុងក្រោយ ប្រភព​ច្បាស់​ការណ៍​បានបញ្ជាក់​ថា មួយ​រយៈ​ចុង​ក្រោយ​នេះ គឺ​នៅ​ថ្ងៃទី ២៤ ខែ ធ្នូ ឆ្នាំ ២០១៨ លោក ម៉ង់ ស៊ី បាន​បើកភ្លើង​ខៀវ​អោយ​រថយន្ត​ចំនួន ២ គ្រឿង ចូល​តាម​ចំណុច​ចំការ​ស្វាយ និង​ត្រង់​បង្គោល​ឡាក់​លេខ ៥៣ ដែល​ចំណុច​ទាំង ២ នេះ មាន​ចម្ងាយ​ពី​ច្រករបៀង ព្រះពុទ្ធ ឬ ច្រក បឹង​ឆ្នាំង ប្រហែល ៧០០ ម៉ែត្រ តែប៉ុណ្ណោះ ។​

​មិន​ត្រឹមតែ​ប៉ុណ្ណោះ​ទេ លោក មេបញ្ជាការ វរៈ ៨១៩ បាន​ប្រមូល​លុយ​ពី​មន្ត្រី មួយចំនួន នៅក្រោម​ឱវាទ ក្នុង​ម្នាក់ៗ ចាប់ពី ១ ៥០០ ដុល្លារ ដល់ ៣ ៥០០ ដុល្លារ​ដោយ​សន្យាថា និង​តម្លើង​ឋានន្តរសក្តិ ឬ​ក៏​តម្លើង​តួនាទី​អោយ តែ​ធាតុពិត​គឺ​រហូត​មក​ទល់​នឹង​ពេលនេះ មាន​រយៈពេល​ជិត ១ ឆ្នាំ​ហើយ ដែល​គ្មាន​ពន្លឺ​អ្វី​បន្តិច​ទាល់តែសោះ គឺ​គេ​បាន​យក​លុយ​ទៅ​ស៊ីចាយ​យ៉ាង​សប្បាយ​ទៅវិញ ថែម​ទាំង​ស៊ីដាច់ ប្រាក់ឧបត្ថម្ភ​ប្រចាំខែ ពី​សម្តេច ទៅលើ​បណ្តា​ប៉ុស្តិ៍​គ្រប់​ប៉ុស្តិ៍ តាម​ខ្សែ​បន្ទាត់​ព្រំដែន​ផង​ដែរ ។​

​តាមរយៈ​ទូរស័ព្ទ កាលពី​ព្រឹក​ថ្ងៃទី ២៥ ខែ មករា ឆ្នាំ ២០១៩ លោក ម៉ង់ ស៊ី បាន​គម្រាម​ថា លោក​នឹង​ប្តឹង​ទៅ​លើ​ប្រភព​ណា​ដែល​រាយការណ៍​មិន​ពិត ដើម្បី​អោយ​កាសែត​ផ្សាយ​ពាក់ព័ន្ធ​នឹង​រឿងអាស្រូវ​របស់​លោក ដោយ​លោក​បាន​សង្កត់ធ្ងន់ថា បើ​លោក​ចេះ​រកស៊ី​អញ្ចឹង លោក​មិន​ចាំបាច់​មក​ធ្វើ​ជ​ប៉ូលីស​នោះទេ ។ ហើយ​លោក ក៏​បាន​អះ​អង​ថា បើ​ចង់ដឹង​រឿង​នេះ​ច្បាស់​ត្រូវ​សួរ​ទៅ​លោក អភិបាលស្រុក កំរៀង​ផង ។​

​ភាសា​ដែល​ទម្លាក់​អោយ​កម្ពុជា​ថ្មី សួរ​ទៅ​លោក​អភិបាលស្រុក ធ្វើអោយ​មាន​ការងឿងឆ្ងល់​កាន់តែ​ខ្លាំង​ថា តើ​លោ​អភិបាលស្រុក​មាន​ការពាក់ព័ន្ធ​នៅក្នុង​រឿង​នេះ​ដែរ ឬ​យ៉ាងណា ?
​ប៉ុន្តែ​តាម​ការបកស្រាយ​របស់​លោក​អភិបាលស្រុក សុខ គឹម​ខុន​បានអោយដឹងថា រឿង​នេះ​លោក​គ្រាន់តែ​ដឹងថា បើ​តាម​ច្រករបៀង​តែម្តង គឺ​គេ​មិន​អាច​នាំ​ចេញ​បាន​ទេ ព្រោះ​ភាគី​ថៃ​ក៏​មាន​ការ​រឹតបន្តឹង​ដែរ ប៉ុន្តែ​គេ​ខ្លាច​តែ​រថយន្ត​ចេញ​តាម​ចំការ​ដំឡូង ឬ ចំការ​ស្វាយ ដែល​នៅ​សង​ខាង​ប៉ុស្តិ៍ ព្រោះ​ខ្សែបន្ទាត់​ព្រំដែន​នៅ​ក្នុង​តំបន់​នេះ​គ្មាន​អូរ​ទេ គឺ​ដី​រាបស្មើ​ទាំងអស់ ។​

​ដោយឡែក ចំពោះ​ប្រភព​មួយ​ដែល​ធ្លាយ​ពី​ជួរ​ថ្នាក់ដឹកនាំ​កំពូលៗ នៅក្នុង​ស្នងការដ្ឋាន​នគរបាល​ខេត្ត គឺ​បាន​អោយដឹងថា ប្រមាណ​ជា ២ ខែ​មុន លោកស្នងការ​បាន​កោះប្រជុំ​ដល់​បណ្តា​មេ​វរៈ និង​មេ​ប៉ុស្តិ៍​ជួរមុខ​ទាំងអស់ ដោយ​ដាក់​វិន័យ​យ៉ាង​តឹងរឹង​បំផុត គឺ​ហាម​ដាច់ខាត​ការបើក​អោយ​រថយន្ត​ចង្កូត​ស្តាំ​ហូរ​ចូល​មក​កម្ពុជា ថែមទាំង​បាន​អោយ​មេៗ​ទាំងនោះ​ផ្តិតមេដៃ លើ​កិច្ចសន្យា​នោះ​ទៀត​ផង​ផ្ទុយទៅវិញ បែរ​ជា​លេច​ធ្លាយ​នូវ​ការបើក​អោយ​ឈ្មួញ​នាំ​ចូល​នូវ​ប្រភេទ​រថយន្ត​ចង្កូត​ស្តាំ​នេះ វិញ​ដដែល​តាម​ច្រក​ព្រះពុទ្ធ សបញ្ជាក់​អោយឃើញ​ថា លោក​មេបញ្ជាការ វរៈ ៨១៩ មិន​បាន​គោរព​តាម​កិច្ចសន្យា​ដែល​លោក​ស្នងការ បាន​កំណត់​នោះ​ឡើយ ដូច្នេះ​ប្រភព​ជាច្រើន​ដែល​កំពុង​ទទួល​នូវ​ការកៀបសង្កត់​ពី​លោក​មេបញ្ជាការ​វរៈ រូបនេះ នឹង​រង់ចាំ​មើល​ថា តើ​លោក​ស្នងការ​នឹង​ចាត់វិធានការ​បែប​ណា​ទៅ​លើ​បុគ្គល​ដែល​ផ្គើន​នឹង ថ្នាក់ដឹកនាំ ? ៕